كل ده عااااااادي فى الاطفال

كل ده عااااااادي فى الاطفال

**الطقطقة عمرها ما كانت ولا هتكون نقص كالسيوم وعادى جدا ومعظمنا بنطقطق وانا اولهم
**ابنك سخن من غير اى اعراض تانية ….ياكل سمك و بيض و زبادي و عدس و شيكولا و موز عادى جدا بس….
انما لو سخن مع ترجيع او اسهال…لازم طبعا اخد بالى من اكله…يعنى ياكل رز وشربة، لسان عصفور، شوربة خضار، زبادى، تفاح، جزر، شاى ببسكوت ، ، ، ونبعده عن السكريات واليانسون والكوسة والشيكولاتةوالشيبسي والمياه الغازية(في المطلق)
**اللبن بعده موز عمره ما يموت… ده انا بعشق عصير الموز باللبن(منكم لله جوعتونى) ،بعض الأدوية لو حطيتها في اللبن عمرها ما تموت
**السمك و اللبن مع بعض عمرهم ما هيجيبوا نقرص و غيره
**اللبن البقري او الجاموسي ممنوعين قبل سنة….لكن منتجات الالبان زى الزبادى عادى جدا والله
الطفل قبل سنة لبن طبيعي او صناعي بس بس بس
في دراسة جديدة قالت ان الزبادي مسموح بيه و ان بروتينات اللبن المسببة للحساسية بتتكسر فيها علشان كدا اديها من 6 شهور
**ادي لبن مع عسل اسود او بمعني ادق اى اكل فيه كالسيوم ممكن ناكله مع اى اكل فيه حديد عادى جدا، والجسم هيمتص الاتنين و هيستفاد ان شاء الله ،بس طبعا في الادوية يستحسن نفصلهم عن بعض
** اقسم بالله فيه امهات عاوزة ال… بتدى السفن اب من شهرين ….طبعا غلط جدا
**والله العظيم لو قعدنا نلحس للطفل قهوة عمره ما هيبقي اذكي و لا هيتكلم اسرع ☕ بالعكس هيسهرك و انتي اللي هتقعدى تكلمي نفسك طول الليل اه و الله دي مجربة
**الكوسة لو اكلتيها ببزرها عمر ما ابنك هيجيله ديدان
**الطفل لو اكل بقوليات قبل سنة عمر ما يجيله انيميا الفول الا لو عنده استعداد وراثى اصلا
**اللي يقولك ان الطفل اللي عنده اربعين يوم لو مأكلتيهوش هيطلع بيكره الاكل ….بالشبشب على دماغه…انا زهقت اصلا …ده الواحد بيشوف مصايب
**تقبل الطفل للاكل طبيعة و استعداد ليس الا….والأطفال مش زى بعض
**الزيت زى زيت الزيتون مش ممنوع لحد سنة…..ممكن بس اضافته تكون علي البارد…. مش تسخنيه و تحمري فيه
*** والله العظيم لو ضربتي لبن في بيض و حليتيه بالعسل عمر ما مناعته هتبقي زي الفل…ده انا هضربك بكل حاجة تيجى في ايدى ، ، ، غلط جدا البيض الني بيعمل تسمم و من اخطر الحاجات علي صحة اطفالنا فبلاش احسنلك
**الطفل لو بقه بيوجعه …بلاش عشان خاطرى يرضع من معزة
**لبن الرضاعة للرضاعة فقط…. يعنى بلاش تحطي في عينه ودنه ومناخيره أو تدهني جسمه عشان يقلل الشعر …..كل ده غلط
** وحياتى عندكم بلاش رضعة بيبي درينك و اعشاب في المستشفي غلط جدا جدا جدا …..الرضاعة فقط عشان خاطرى
** متكلمنيش من اول يوم الولادة وتقوليلي مفيش لبن ، وبعدين اسألك طب فيه لبن السرسوب؟ تقوليلي اه…على اساس ان لبن السرسوب مش لبن…. و الله لبن و بيكفي الطفل جدا و بيغني عن اي حاجة
**اللبن الصناعي اوعى تعملي بيه مهلبية و بشاميل و حاجات كدا لأنه
غلط جدا انه يتسخن علي النار، ، بس ممكن اضيفه علي البارد
** بلاش تنظيم الرضاعة…رضعى لما طفلك يحتاجك
تخيلي انك جعانة و بتعيطي و بقولك لسا ساعتين ….ممكن انا اقولك نظمى الرضاعة لو حسيت ان وزن ابنك بيزيد فوق فوق الطبيعي
** بالله عليكم بلاش كلمة لبنى خفيف و مش بيشبع …لو وزنه بيزيد كويس خلاص بلاش فتي وبلاش صناعى
** مفيش حاجة اسمها البنات بيرضعوا اكتر من الولاد…فيه طفل بيرضع كتير و طفل قليل بس كدا
** بلاش الطفل اللي بيرضع صناعي تشربوه مية من اول يوم
لأن انتي اصلا بتعملي الرضعة بمية، فبلاش حجج واهية انه عطشان
**الفطام مش لازم اخر الشهر العربي أو يكون متزامن مع رؤية الهلال
** الطفل اللي يتفطم و يرضع تاني عمره ما هيكون حقود….حضرتك الصفات السلبية ابنك بيكتسبها من اللي . خدي بالك
**الطفل بعد سنة اللبن عمر ما فايدته بتضيع و ربنا قال في عامين
*** الشكوى المتكررة…..ابني بيعيط و يمص صباعة وحاساه مش بيشبع و صدري مش تقل باللبن و بعصر بينزل نقط مش بملي ازازة
والنبى بلاش مبررات هنسأل تاني وزنه زاد ؟طب بيعمل يورين كويس..
يبقي شكرا… متخليش حد بقي يضحك عليكي و ربنا يعينك
**الخوافض اول 6 شهور سيتال….تاني 6 شهور بروفين….بعد السنة ممكن دولفين او كاتفلاي بس علي شرط يكون الطفل سخن جدا
يعني هدي كمادات و بروفين نص وزنه كل 6 ساعات و ربنا معاكي
**الاسهال اللي زي المية علاجه مش سميكتا و لا هيكون كابكت ….هناخد محلول جفاف ونكشف …لأن ده ميكروب عايزين نطرده، مش هندي ممسكات عشان نوقف الاسهال مرة واحدة ….بالعكس احنا هنعوض جسم الطفل بالسوائل بس
**الطفل اللي بياخد مضاد حيوي كتير سنانه مش بتتاثر …مناعته هى اللي بتتأثر لو بناخده من نفسنا بدون وصف طبيب
**نقط علاج الصفرا و دوا شراب والاقراص اللي بتدوبوها و الحاجات دي هري هري هري….الصفرا اما فسيولوجية و هتضيع بالرضاعة او مرضية و عايزة حضانة خدي بالك
***الكالسيوم بنقولها كتير لازم تحاليل و الا بيترسب علي الكلي
***دوا المغص و الخافض و الله مش بمواعيد…. عند اللزوم بس
**لبوس الجلسرين مرة كل 5 ايام …ومفيش منه تعود، بس الاحسن و الاكثر إفادة زيت لوز حلو 5 نقط يوميا… ملين ممتاز
**في دروب ده( حماده ) و الفيتامين د النشط (حمادة) تاني خالص… واحد وقاية و التاني علاج
***الكحة علاجها كشف بالسماعة ،والتهاب الحفاض يفضل كشف لأنه انواع ،و التهاب الزور اساسي كشف، و النزلات المعوية كشف وش
**السيتول الاخضر مش برد… ده ان الطفل مش بياخد اللبن الخلفي و بيكتفي باللبن الامامي بس….حله نرضع من كل ناحية مرتين لحد ما نفضيها مش نبدل الطفل بين الثديين بسرعة
**لو الطفل بيستحمي و المية دخلت ودنه… مش هيجيله التهاب بالأذن
**الطفل اول ما يتولد بلاش قرف بالله عليكم انك تدهني جسمه بلبن الام او دم الوطواط عشان يطلع شعر جسمها خفيف
** طفلك لما يشرق بلاش تنفخي في وشه….خبطي علي ضهره كفاية
**لو اخد دوا و بعدها رضع او شرب مية …الدوا مفعوله مش هيقل خالص
**بلاش هبل انك متقصيش ضوافره بليل علشان الكالسيوم و الشعر متقصيهوش في نص الشهر و الختان لما تشوفي الهلال و افطمي اخر الشهر ….عادات لا معني لها اساسا
**لو وقفتي الطفل علشان يشد رجله و مشدهاش…عادى جدا على حسب عمره ومش معنى كده انه يبقي محتاج كالسيوم
**كرش الطفل مش بسبب شرب المية وسط الاكل…لا الكرش سببه ضعف عضلات البطن للطفل او اكل الاكل اللي سعراته الحرارية عالية
**الطفل لو اخد التطعيم و ما سخنش …عادى جدا والله ومش بايظ ولا حاجة
**تغيير لون البراز عادى جدا…..اهم حاجة ميكونش اسود ولا أحمر
**قص الشعر مش بيخليه احلى ولا حاجة…ولكن قص الطروف مطلوب
**التقوس في حديثي الولادة عادى جدا والله
**مفيش حاجة اسمها جرعة ديدان وقائية…ولكن ممكن نديها لأفراد العائلة الواحدة عند اثبات اصابة فرد فيهم بتحليل البراز
**مفيش حاجة اسمها ابنى دفيان….فيه اختراع اسمه ترمومتر بيقيس الحرارة…لو اكتر من 37.5 يبقي سخن ..غير كده لأ
***التسنين مش بيسبب برد او كحة او التهاب في العين…بالكتير ممكن حرارة بسيطة متعديش 38.5 او اسهال خفيف و ريالة و زن مستمر
**حكاية دهان الصدر بزيوت او مستكة او نحط ورق جرايد اثناء الكحة بصراحة. No comment
**جلسات الاستنشاق مفيش منها تعود ولا بتدخل ميه لا على القلب ولا الرئة…وهى احسن و أامن علاج للكحة وكمان البخاخات
**الكورتيزون الانفى والفمى اللي موجود بالبخاخات مفيش منه اى مشاكل
**الحقن قبل 5 سنوات تكون في عضلة الفخد فقط
**المشاية مش قبل 8 شهور وبكرهها بالمناسبة…بشوف حوادث بسببها بالعبيط
**مفيش زيوت للشعر قبل سنة
**البوست ده لو ملفش العالم هيبقي فيه زعل جامد

اترك رد

لن يتم نشر عنوان بريدك الإلكتروني.

%d مدونون معجبون بهذه: