نصايح مهمه لفتح شهيه الاطفال 😊😊😊… بس نصيحه بلاش تقريها

نصايح مهمه لفتح شهيه الاطفال 😊😊😊… بس نصيحه بلاش تقريها 😆😆😆
1- لا تجبري طفلك على تناول أي نوع من الطعام لا يحبه .. الاهتمام مبينطلبش يا ماما 😆😆
2- نظمي مواعيد الطعام بأوقات محددة و ثابتة و لا تقدمي أي نوع من الطعام بينهم…. الاسطه برايز بيقولنا العيب في النظام يا بشر 😆😆
3- وجبة الإفطار أهم وجبة يجب تناولها عند الأطفال فهي تزيد من الشهية للطعام …. وطبعا لازم تتصرفي في ميدو اللي بيصحي الظهر وعايش عيشه الفنان 😃😃
4- كوب من الماء قبل نص ساعه من تناول اي وجبة من الطعام لتحفيز الشهية لديه …. والمفروض كوب الماء ده يشربه مش يدلقه علي دماغ دودو اخوه 😆
5- قدمي اللبن ومشتقاته أو عصائر الفواكه مع الوجبات الرئيسيّة فقط و ليس بينهم لأن إمتلاء معدة الطفل باللبن أو العصير سيقلل من شهيته للطعام …. وربنا يعينك وتقدري ☺☺
6- كوني صبورة عند تقديم نوع جديد من الطعام للطفل خصوصاً اذا رفض الطفل تناوله و تحدثي إليه بإستمرار عن فوائده شكله لونه طعمه و رائحته و بطريقة شيقة و ممتعة كما إستمري بإضافة هذا النوع من الطعام الى طبق الطفل جنباً الى جنب من طعامه المفضل حتى يتقبله …. وباذن الله هيرميه في الشارع .. قصدي هيتعود عليه بالتدريج وياكله 🤣🤣
7- يحب الأطفال طريقتهم الخاصة بالتعامل مع الطعام و يفرحون عند مجاراتكم لهم بها و تعتبر من الطرق الناجحة في جذب اهتمام الطفل إحضار طبق أطفال خاص ذو لون جميل يحبه الطفل و مقسم الى خانات ( في حال عدم توفره يمكن استخدام قالب الثلج ) و يتم ملئه بأشكال مختلفة من الخضار و الفواكه مقطع الى قطع صغيرة و يمكن إطلاق بعض التسميات الخاصة التي تتماشي مع طريقة تفكير الطفل على كل صنف من هذه الأصناف مثل : هلال التفاح … انا حاسس ان الموضوع ده صعب بس اهي نصيحه 🤣🤣🤣
8- في حال عدم تقبل طفلك لنوع محدد من الطعام فمن الممكن تغطيته بنوع اخر من الطعام الذي يحبه و يتقبله لإخفاء الطعم الغير مرغوب فيه للطعام الأصلي مثل الزبادي الأجبان و العسل … ولو انا متاكد انه هيعرفه لو خبيتيه جوا كهف اغريقي في بطن حوت 🤣🤣🤣
9- يحب الكثير من الاطفال تناول الأطعمة السائلة اكثر من الصلبة فإذا كان طفلك لا يحب الطعام فمن الممكن الطلب منه بأن يساعدك في تحضير عصيره المفضل … وطبعا بعد كل وجبه هتحتاجي تنضفي البيت ٦ ساعات علشان تلمي الكوارث اللي حصلت 😆😆
10- تقطيع الخضار و الفواكه و الساندويش الى أشكال متعددة و تقديمها بشكل أنيق يحاكي تفكير الطفل يفيد في جذب اهتمامه … هو كله هيترمي في الاخر بس الاهتمام حلو 🤣🤣
11- لا تعرضي على طفلك بدائل للوجبة التي قدمتيها له حتى و إن رفض أكلها و لكن لا تسمحي له بمغادرة المائدة حتى تنتهون جميعاً من تناول طعامكم … وخدي عندك صويت وسارينه هتوصل لحد الشارع اللي ورا وراكم 😀😀
12- إصطحبي طفلك اثناء شراء الفاكهه والخضار و أخبريه أنك بحاجة الى مساعدته في اختيار الخضار و الفواكه الذي تودين طبخها اليوم و تحدثي معه عن فوائدها و أنواعها و إجعليه يساعدك في غسيلها و تقطيعها بعد شرائها… لو راح معاكي يشتري الراجل الفكهاني هيطردك وهيقفل المحل ويغير نشاط 🤣🤣… ولو ساعدك يقطعها هيرشق السكينه في مناخير اخوه دودي وهتقضيها اسعاف 🤣🤣🤣
13- من الممكن تقديم الطعام لمجموعة من الأطفال
فالأطفال يحبون النشاطات الجماعية و يميلون للمشاركة فيها … اي نعم هيشدوا شعور بعض وودني يا ماما ودراعي وبطني لكن يالله اهي محاوله ☺☺☺
14- تخصيص رف محدد في الثلاجة و اخبار الطفل بأن هذا الرف مخصص لأطعمته و ضعي فيه الكثير من الأطعمة المتنوعة …. ولو دورتي عليه كتير في الشقه ملقيتهوش هتلاقيه قاعد في الرف ده متقلقيش 😅😅😅
15- تغيير مكونات الوجبات الرئيسيّة فلا مانع من تغيير أصناف وجبة الفطور و تقديم أصناف وجبة العشاء بدلاً عنها و أصناف وجبة الفطور على العشاء اذا كان الطفل لا يأكل بتاتاً و كان هذا التغيير يجعل الطفل يأكل وجباته … وفي تغيير تاني انك متساليش فيه وتنامي النهارده وتسيبي ابوه يتصرف 🙃🙃🙃
16- قدمي للطفل أصناف الطعام الغنية بالسعرات الحرارية و هذا ضروري للأطفال الذين لا يشتهون الطعام و يكونون كثيري الحركة و النشاط مثل : البيض و العسل و البطاطس و الدجاج والأسماك والبقوليات و الزبادي … وهو مش هياكل حاجه منها غير البطاطس ولازم بكاتشب ويلعب لعبه صابعي بيجيب دم يا ماما بالكاتشب 😆😆😆
17- جعل الطفل يمارس اللعب و النشاط بشكل متكرر خلال اليوم لأن النشاط تحفز الشهية… وهو مش ناقص نشاط ابوس ايدك يا دكتور 😭😭.. انت شكلك مجنون النهارده هجيلك بكره 😆😆😆
18- لا تتوقعي أن تتحسن شهية طفلك للطعام لو كُنتُم تتبعون نظام غذائى غير منظم ( كونوا مثالاً و قدوةً لأطفالكم )…. وطبعا بابا مقضيها بشاميل وبيبسي وبطاطس وكل الاكل المضر .. بصي انسي الحل ده 😅😅😅
19- عدم إعطاء الطفل الفلوس أو الهدايا مقابل أن يأكل لأنه سيمتنع عن الأكل في كل مرة حتى يأخذ شيء بالمقابل … وغالبا الموضوع هيتطور وهياخد الحاجه ومش هياكل حاجه 😄😄😄
20- التقليل من الحلويات والسكريات لأنها تقلل الشهية حيث يجب تقديمها للطفل بعد الوجبات الرئيسية و ليس قبلها … لو مخدش الحلويات جهزي نفسك لسارينه هتخرم ودنك ليل نهار … وهيقولك سلمي واستلمي يا مامي 🤣🤣🤣
21- عدم إضافة الكثير من التوابل الحارة ذات الرائحة القوية كالفلفل الأسود الكارى الثوم و غيرها الى الطعام مما يسبب رفض الطفل لتناوله و بالمقابل الإكثار من التوابل التي تحفز الشهية مثل الكزبرة الشمر و القرفة. .. هو كده كده بيلحس التوابل ويرمي الاكل بعد كده فكده هتوفري كتير 🤣🤣🤣
22- عدم الإكثار من تقديم الأطعمة المقلية مثل البطاطس المقلية او الدجاج المقلي للطفل لإنها تزيد من الإحساس بالشبع و تقلل من الشهية للطعام… مش عارف هتعملي كده ازاي بس ربنا معاكي 🤣🤣🤣
23- الإكثار من تناول الأطعمة الحاوية على مركب الزنك لكونه يحفز من الشهية عند الأطفال مثل الكاجو الفول السوداني اللوز البندق اللحوم بأنواعها … يا دكتور احنا بنجيب كيس كاجو ونخبيه منهم بالعافيه علشان يقعد ساعتين في البيت … وبعدين انت منقي الحاجات الغاليه ليه يا دكتور هي ناقصاك؟ 🤣🤣🤣🤣
24- لا تجعلي من وقت تناول الطعام وقت للمناقشات و حل المشاكل العائلية بل إجعليه وقت للمرح و المتعة لترغيب الطفل في الجلوس على المائدة و تناول الطعام … هو اكيد الوقت ده مش مناسب … بس لحظه ضعف جوزي وهو بياكل فبحب اطلب كل حاجه ساعتها ودي فيها حاجه ؟؟ 🤣🤣🤣
25- لا تفيد الفيتامينات بزيادة الشهية عند الأطفال إلا إذا كان هناك نقص بها … ورغم كده الامهات هتديها هتديها ريح نفسك يا دكتور احنا بننفخ في قربه مقطوعه

اترك رد

لن يتم نشر عنوان بريدك الإلكتروني.

%d مدونون معجبون بهذه: